✅ Дотоод хэргийн их сургуулийн 2025-2026 оны хичээлийн жилийн төгсөгчдийн “Туяат оройн тооллого” ёслолын ажиллагаа өнөөдөр (2026.06.19) ёслол төгөлдөр боллоо.

✅ Ёслолын ажиллагаанд Монгол Улсын Их Хурал, Засгийн газрын гишүүн, Хууль зүй, дотоод хэргийн сайд С.Амарсайхан, Дотоод хэргийн их сургуулийн захирал, доктор (Ph.D), профессор, бригадын генерал Т.Сүхболд, ЗГХЭГ-ын Санхүү, хөрөнгө оруулалтын газрын дарга Д.Гантуяа, БЗД-ийн Засаг дарга И.Баттөгс, ХЗДХЯ-ны харьяа агентлагуудын удирдлагууд, ОХУ, Япон улсаас Монгол Улсад суугаа дипломат албаны төлөөллүүд, Олон улсын байгууллагын хүндэт зочид, багш, албан хаагчид, төгсөгчдийн гэр бүлийнхэн оролцов..

✅ Энэ үеэр Хууль зүй, дотоод хэргийн сайд С.Амарсайхан “Төрийн эрх зүйн шинэтгэлийг хэрэгжүүлэх, хууль дээдлэх ёсыг бэхжүүлэх, иргэдийн эрх, эрх чөлөөг хамгаалах, нийгмийн хэв журам, дотоод аюулгүй байдлыг хангах өндөр хариуцлага та бүхэнд ирлээ. Иргэнтэй ялгаварлалгүй харьцдаг, авлига, ашиг сонирхлын зөрчлөөс ангид, албан тушаалаа урвуулан ашигладаггүй, хариуцлагаа ухамсарласан, соёлтой хүнлэг харилцаатай алба хаагчдаар бидний эгнээ бүрдэх учиртай.

Эрхэм төгсөгчид та бүхэн ард түмнийхээ амар тайван амьдралын төлөө зүтгэх тангарагтаа үнэнч байж, мэдлэгээрээ манлайлж, ёс зүйгээрээ үлгэрлэн, эх орныхоо хөгжил дэвшилд үнэтэй хувь нэмэр оруулсан чадварлаг төрийн албан хаагч болно гэдэгт итгэл төгс байна” хэмээн онцлов.

✅ Бүрэлдэхүүн сургуулиуд тус тусдаа “Туяат оройн тооллого” явуулж, Цэргийн албаны зохион байгуулалт, бэлэн байдлын хэлтсийн дарга, дэд хурандаа Л.Зэсшагай нэгдсэн дүнг Их сургуулийн захиралд илтгэв. Төгсөгчид гурвантаа “Уухай” цуурайтуулахад Монгол Улсын Төрийн дуулал эгшиглэн харанхуйг гэрэлтүүлэн ёслолын буудлага буудлаа.

✅ Аранзал улаан тугийнхаа сүлд хийморийн дор сүүлчийн оройн тоондоо жигдрэн жагсан төгсөгчид ёслолын жагсаалаар алхсанаар Дотоод хэргийн их сургуулийн төгсөгчдийн нэгдсэн туяат оройн тооллого өндөрлөлөө.